Сүхбааатар  аймгийн онцгой комисс 2020.01.29 өдөр  хуралдаж дараах шийдвэрийг гаргасан байна. Баар, ресторан, зоогийн газар, караоке зэрэг нийтийн үйлчилгээний газруудын ажиллах цагийг оройн 22:00 цаг  хүртэл ажиллуулахаар болгосон байна. Мөн АНЭ-ийн эмч нарын ажлын ачааллыг харгалзан үзэж, авто замын постод сургууль, цэцэрлэгийн эмч нарыг татан оролцуулах, Корона вирусын халдварт өвчинтэй холбогдуулан зайлшгүй шаардагдах зарим зардал хөрөнгийн асуудлыг шийдвэрлэхээр болжээ. Түүнчлэн Бичигт хилийн боомтоор орж, гарч буй газрын тосны тээвэрлэлтийг хязгаарлаж, Монгол, Хятад талын жолооч нарыг өөр өөрсдийн улсад нь татах хүсэлтэй байгааг "Улсын онцгой комисс"-т саналаар хүргүүлэхээр болсон байна.
        Эрдэнэцагаан сум, Бичигт хилийн боомтод ажиллах ажлын хэсгийг аймгийн Мэргэжлийн хяналтын газар, Онцгой байдлын газар, Цагдаагийн газар, Тагнуулын хэлтэс, Эрүүл мэндийн газрын холбогдох албан хаагчдын бүрэлдэхүүнтэй томилсон. Тус ажлын хэсэг нь Коронавирусын халдвараас урьдчилан сэргийлэх арга хэмжээ, сургалт сурталчилгааны ажлыг зохион байгуулж, мэргэжил арга зүйн зөвлөгөө өгч ажиллаж байна.