Хүн ам өссөн учир аймгийн ИТХ-ын 2014 оны 6 дугаар сарын 30 – ны өдрийн 7-р хуралдааны 06 тоот тогтоолоор оршин суугчдын болон Цахир, Эрдэнэбулган сумын ИТХ, Засаг дарга түүний Тамгын газруудын саналыг дэмжиж хоёр баг шинээр байгуулахаар шийдвэрлэсэн.

Үүний дагуу Эрдэнэбулган сумын ИТХ-аас баг байгуулахыг Засаг даргад даадгасан. Эрдэнэбулган сумын Засаг дарга Э.Оюунчимэгийн захирамжаар шинэ баг байгуулах бэлтгэл ажлыг ЗДТГ-ын дарга Б.Бавуугарьдаар ахлуулсан комисс хангаж, 2015 оны 10-р сарын 9-ний өдөр Д.Ичинхорлоогийн нэрэмжит Хөгжим Драмын театрт аймгийнхаа 101 дэх засаг захиргааны анхан шатны нэгжээ зохион байгуулах хурал, сонгууль боллоо.

Тус багийн ИНХ-ын даргад Ардчилсан Намаас Алтангэрэлийн Ширмээ, Монгол Ардын Намаас Ширчингийн Дашдэндэвийн нэрийг дэвшүүлэн сонгогч оршин суугчдын саналыг нууцаар авлаа.

Тооллогын комисс саналын хайрцгийг задлахад 257 хуудас гарсны 24 буюу 9,4 хувь нь хүчингүй байлаа. Хүчинтэй 233 хуудаснаас А.Ширмээд 129, Ш.Дашдэндэвийн төлөө 106 хүн саналаа өглөө.