Зүүнбүрэн сумын иргэдийн Төлөөлөгчдийн Хурлын цахим хуудсанд зочлогч танд энэ өдрийн мэнд дэвшүүлье. Ардын хувьсгалаар овоглож, амуу буудайн эх нутаг гэдгээрээ алдаршсан энэ сайхан нутгийн маань түүх соёл, хөгжил дэвшил, бүтээн байгуулалт, Зүүнбүрэн сумын иргэдийн Төлөөлөгчдийн Хурлаас гаргаж байгаа бодлого шийдвэрийн талаар та энэ хуудаснаас мэдээлэл авч чадна гэдэгт итгэлтэй байна. Эдгээр мэдээлэлдээ тулгуурлан бидэнтэй ажил хэргийн харилцаа тогтоож, хамтран ажиллах, хөрөнгө оруулалт хийж бизнесийн үр ашгаа өргөжүүлэх,Зүүнбүрэн нутгийн үзэсгэлэнт онгон дагшин байгальд аялж зугаалан, амарч саатан алжаалаа тайлж, тухлан зочлох өргөн боломж танд байна. Зүүнбүрэн нутагт тавтай морилно уу.

1921 оны 11 дүгээр сарын 02-ны өдөр Ардын Засгийн газраас ардын бүх хүүхдийг гэгээрүүлэх зорилгоор анхны бага сургууль байгуулах тухай тогтоолыг баталсан нь шинэ цагийн боловсролын суурь тавигдаж, улмаар Монголчууд биднийг бичиг үсэг тайлж мэдлэг боловсрол эзэмшин, дэлхийн хөгжил дэвшил, соёл, шинжлэх ухаанд суралцан улс эх орноо хөгжүүлэхэд хүн бүр хувь нэмрээ оруулах боломжийг олгосон томоохон ололт байлаа. Нэгэн зууны өмнө үнсэн самбар, бийр бэхээс эхэлж байсан боловсролын салбар маань өнөө үед үүлэн технологи, бичил компьютер ашиглан хөгжин дэвшиж, улс үндэстнээрээ дэлхийн боловсролтой хөл нийлүүлэн алхахад үе үеийн сурган хүмүүжүүлэгч эрдэмтэн багш нарын уйгагүй хөдөлмөр зүтгэл, аугаа сэтгэлийг мартаж үл болно. Боловсролын салбарын үе үеийн багш, ажилчид, сурган хүмүүжүүлэгчид, суралцагчид болон үр хүүхдээ эрдэм мэдлэгээр чимсэн нийт эцэг эхчүүддээ Монгол Улсад орчин цагийн боловсролын салбар үүсэж хөгжсөний 100 жилийн ойн баярын мэндийг дэвшүүлэн мэндчилье. Эрдэм номын цагаан буян машид дэлгэрэх болтугай.

Зүүнбүрэнчүүд ээ Элэг нэгт ахан дүүс ээ! Та бүхэндээ Тулгаp төрийн 2230, Их Монгол Улсын 815, Үндэсний эрх чөлөө, тусгаар тогтнолоо сэргээн мандуулсны 110, Ардын хувьсгалын 100 жил, Монгол Улс НҮБ-д бүрэн эрхт гишүүнээр элссэний түүхт 60 жилийн ойн баярын мэндийг өргөн дэвшүүлье! Монголын ард түмний Үндэсний их баяр наадам гэдэг бол Монгол Улс, Монгол үндэстэн, монгол хүний хувьд төрт ёс, тусгаар тогтнол, түүх соёл, эв нэгдэл, мандан бадрахын бэлгэдэл, Монгол үндэстний оюун санааны дархлаа, нүүдэлчин соёл иргэншил, зан заншлын түүхэн уламжлал бөгөөд үеийн үед мөнхлөн тэмдэглэж байх ёстой үнэт зүйл юм. Гэвч энэ удаа дэлхий нийтэд түгээд байгаа “Ковид-19” цар тахлын хор хохирлыг тооцон манай улсын эрдэмтэн судлаачид, мэргэжлийн байгууллагуудын өгч буй зөвлөгөө, шийдвэрийг үндэслэн Монгол Улсын Засгийн газраас Үндэсний их баяр наадмыг энх тунх сайн цаг ирэхэд тэмдэглэхээр хойшлуулаад байна. Энэ шийдвэр нь манай улсад тохиолдож болзошгүй аюулт эрсдэлээс үр хүүхэд, ард иргэдийнхээ амь нас, эрүүл мэндийг хамгаалсан, аж амьдрал, сэтгэл санааны хувьд нөхөж баршгүй хохирол амсаад байгаа иргэддээ хүн ёсны хувьд ч, ёс суртахууны хувьд ч хүндэтгэлтэй хандсан хүнлэг шийдвэр гэдгийг манай сумын ард иргэд түмэн уужим саруул ухаандаа тунгаан ойлгож байгаа гэдэгт итгэлтэй байна. Хэдийгээр энэ жил онцгой нөхцөл байдлын улмаас Үндэсний их баяр наадмаа хойшлуулж байгаа боловч хүн болгон зүрх сэтгэлдээ өв соёл, үүх түүхээ эрхэмлэн дээдэлж, үр хүүхдэдээ сурталчлан таниулж, сэтгэл оюундаа хүндэтгэн бодож зөвхөн гэр бүл дотроо ёслон тэмдэглэхийг хүсье. Айл өрх бүрийн хойморт аз жаргал, инээд баясал цалгиж, хүн бүрийн зүрх сэтгэлд энэрэл нигүүлслийн гэрэл гэгээ мөнхөд бадамлаж байх болтугай. • Морин дэл дээр ассан монгол хүний хийморь галын дөл шигээ өөдөө байг.

Улиран өнгөрч буй хуучин ондоо Зүүнбүрэнчүүд бид амжилт бүтээлээр дүүрэн он өнгөрч байна.Хэдийгээр дэлхий нийтийг хамарсан цар тахлын хүнд үе байсан ч иргэд маань ногоочид маань төмс хүнсний ногооны үйлдвэрлэлээ, малчид маань мал аж ахуйн үйлдвэрлэлээ,зөгийчид маань зөгийн аж ахуйн үйлдвэрлэлээ,газар тариаланчид маань үр тариа,тэжээлийн ургамлын үйлдвэрлэлээ амжилттай гүйцэтгэж аймгийн болон сумынхаа нийгэм эдийн засгийн өсөлтөд чамгүй амжилтыг гаргалаа.Ирж буй шинэ он та бидэнд аз хийморь,амжилт бүтээлээр дүүрэн он байхыг бэлэгдэн ерөөе.Шинэ ондоо гэр бүлээрээ инээд хөөр баяр цэнгэлээр дүүрэн сайхан баярлахыг өргөн дэвшүүлье.